DRC tayandje oshimaliwa shee $5 million, ku keshe oo taka popya opo pena ovawiliki va 3 vee rebels

Oshilongo Democratic Republic of Congo (DR Congo) osha shiivifa tashiyandje olupandu le $5 million ku keshe oo taka yandja ouyelele kombinga yo vakwateli komesho veli 3 vongudu yee M23 rebel.

Mokati kaavo tava kongwa, omwa kwatelwa oo ali nale omunambelewa omuulunhu woshikondo sho commisi yo mahoololo chief Corneille Nangaa, ondjayi yetanga leameno  Sultani Makenga, oshoyo omunapolitika  Bertrand Bisimwa.

Aveshe va 3 ovo tava kongwa ova pewelwe ehandukilo lefyo omudo wadjako, osho shaningilwe vehepo tava tamanekelwa  oilonga yoku halonga nouyuuki.

Olopota oyati no nande payandjwa oshimaliwa shaao tapopi opo tava dulu oku hangwa, natango onghee tuu sha djuupalela epangelo oku vamangapo eshi ee rebel tadi kwafelwa noku tuwa epepe ku Rwanda,  tadi twikile noku kwatako oitopolwa yafimana youshilo woshilongo DR Congo, ngaashi  Goma na Bukavu.

Omuvalu wovanhu omayovi no mafele ovadipawa omanga vahapu vaya onapo okudja moitopolwa ili moupyakadi.

OmuPresident wa DRC Félix Tshisekedi okwa yandja eingido koshikondo shopaiwana shokuyandja eendjidikila opo shitulilepo Rwanda, eendjidikila oo tapopiwa kutya okuli ta yambidida ee M23 mo DRC.

Nande ongaho oshilongo Rwanda ,oshelikala filu kutya ota shiyambidida ee rebel do M23.

Olopota yovashiivi nawa vehangano loiwana yahangana oyati konyala omatanga a Rwanda akonda po 4,000 otaa kwafele M23 rebels mo malwoodi omoushilo wa Congo, noku kwatako paife oitopolwa yo pavali ngaashi North Kivu na South Kivu.

Eerebel do M23 oda talika dina eenghono mokati keengudu dee rebele didulife pe 100, odo tadi hangwa moushilo wa DRC oshitopolwa aasho shatalika shiyadi ouyamba weemina.

The post DRC tayandje oshimaliwa shee $5 million, ku keshe oo taka popya opo pena ovawiliki va 3 vee rebels first appeared on Future Media News.

The post DRC tayandje oshimaliwa shee $5 million, ku keshe oo taka popya opo pena ovawiliki va 3 vee rebels appeared first on Future Media News.